Zokirov Siddiqjon

1972-yil 7-avgustda tug‘ilgan.

1994-yilda Toshkent politexnika universitetini tamomlagan.

2005-yilda «SIMAKX-PARS» xususiy ishlab chiqarish korxonasiga asos solgan.

Oilali, bir o‘g‘il va ikki qizning otasi.

Porolon — Skandinaviyaning «Porolon» savdo belgisi nomidan kelib chiqqan va umumiy nomga aylangan materialdir. Ushbu material tasodifan kashf etilgan: 1941-yilda nemis olimlari qattiq poliuretan ishlab chiqarish jarayonida monolit materiallar hosil bo‘lishiga xalaqit beradigan ko‘piklanish jarayonini o‘rganishgan. Shu tariqa porolonning ilk laboratoriya namunalari yaratilgan. Ammo uning ommaviy ishlab chiqarilishi ancha keyin boshlangan, bunga Ikkinchi jahon urushi va undan keyingi iqtisodiy inqiroz sabab bo‘lgan. Hayot izga tushgach, odamlar qulaylik va shinamlik haqida ko‘proq o‘ylay boshladilar. Zavodlar ishlab chiqarish hajmini oshirib, porolon tayyorlashning yangi texnologiyalarini yaratdilar. Natijada qattiqligi, zichligi, egiluvchanligi, issiqlik va shovqin izolyatsiyasi bo‘yicha farq qiluvchi yangi poliuretan ko‘pik turlari paydo bo‘ldi. Materialning qo‘llanish sohasi tobora kengaydi va bugungi kunda zamonaviy inson hayotini porolon ishlatiladigan mahsulotlarsiz tasavvur qilish qiyin.

USHBU MATERIALLNING NOYOB XUSUSIYATLARI uning keng qo‘llanish sohasini belgilaydi: u bir vaqtning o‘zida yengil va qattiq, elastik va mo‘rt, yumshoq va zich bo‘lishi mumkin. Porolon — havo o‘tkazuvchan, gipoallergen, yengil va uzoq xizmat qiladigan universal material bo‘lib, sanoatning ko‘plab tarmoqlarida hamda kundalik hayotda keng qo‘llaniladi.

2005-YILGACHA O‘ZBEKISTON BOZORIDA faqat import qilingan porolon mahsulotlari mavjud edi. Tarkibining qariyb 90 foizi havodan iborat bo‘lgan, hajmi katta va nihoyatda yengil ushbu materialning narxi juda yuqori edi. Biz mamlakatimizda porolon ishlab chiqarishni yo‘lga qo‘ydik va import o‘rnini bosuvchi mahsulot ishlab chiqaruvchilar sifatida mahalliylashtirish dasturiga kirdik. Bu orqali yangi ish o‘rinlari yaratildi va zamonaviy ishlab chiqarish quvvatlari joriy etildi. Ishlab chiqaruvchi sifatida biz mahsulotlarimizni hamyonbop narxlarda taklif etamiz.

«SIMAKX-PARS» KOMPANIYASI yuqori sifatli ikkilamchi porolon ishlab chiqarishni yo‘lga qo‘ydi. Ushbu mahsulot premium mebellar, prujinali blokli mebellar, sport anjomlari (sport matlari, tatami va kurash gilamlari), avtomobil sanoatida shovqin izolyatsiyasi tizimlari hamda stul va kreslolarni tashishda qadoqlash materiali sifatida keng qo‘llaniladi.

KOMPANIYAMIZ MAHSULOTLARI respublikaning barcha hududlarida talab yuqori bo‘lib, O‘zbekistonning Samarqand, Farg‘ona, Andijon, Olmaliq va Qarshi kabi yirik shaharlariga yetkazib beriladi. Ko‘p yillardan buyon «SamAuto», «UZ Dong Yang Co» va «UZ-HANWOO» kompaniyalari bilan samarali hamkorlik qilib kelmoqdamiz.

«SIMAKX-PARS» umurtqa pog‘onasi va tayanch-harakat tizimi deformatsiyalarining oldini olish hamda ularni davolashda samarali vosita sifatida e'tirof etilgan ortopedik matraslar ishlab chiqarishni ham yo‘lga qo‘ydi. Bu sog‘lom uyqu orqali hech qanday qo‘shimcha harakatlarsiz salomatlikni saqlashning qulay usulidir. Matraslarimizning keng modellari har bir oila a'zosi uchun mos variantni tanlash imkonini beradi.

ISHLAB CHIQARISHNI YO‘LGA QO‘YISH BOSQICHIDA biz material yaratishning murakkab jarayonini chuqur va batafsil o‘rgandik, xodimlarimizni o‘qitdik, Rossiyadan mutaxassislarni taklif etdik hamda o‘zimiz ham xorijdagi soha korxonalarida tajriba almashdik. Har qanday sifatli ishlab chiqarishning muvaffaqiyati malakali xodimlar, tajribali muhandis-texnologlar va zamonaviy uskunalarga bog‘liq. Biz yangi ishlab chiqarish texnologiyalarini muntazam kuzatib boramiz va zavodimizni eng zamonaviy ishlab chiqarish liniyalari bilan jihozlaymiz. Yarim asrdan sal ko‘proq tarixga ega bo‘lgan porolon va unga oid mahsulotlar ishlab chiqarish sohasi jadal rivojlanmoqda. Biz ham zamon bilan hamnafas bo‘lib, nafaqat mahalliy iste'molchilar ehtiyojini qondirishga, balki ularning kelajakdagi talablarini ham oldindan ta'minlashga intilamiz.