Umarov Bobur

1979-yil 6-oktyabrda Namangan viloyatining Chorkesar qishlog‘ida tug‘ilgan.

1999–2003-yillarda O‘zbekiston davlat jahon tillari universitetining “Xalqaro jurnalistika” fakultetini tamomlagan.

2001–2007-yillarda “Yosh kuch”, “Sinfdosh”, “Hamshira” nashrlarida jurnalist; “Avto Olam” nashrida jurnalist, dizayner, sahifalovchi va fotograf sifatida faoliyat yuritgan.

2005-yilda ITAR-TASS axborot agentligining muxbiri bo‘lgan.

2005–2007-yillarda “Simplitsissimus” va “Shinavanda-Print” bosmaxona kompaniyalariga rahbarlik qilgan.

2007–2010-yillarda Rossiyada tadbirkorlik faoliyati bilan shug‘ullangan.

2011-yil fevral oyida “UU-MARKET” Savdo belgisi ostida faoliyat yurituvchi “SHINAVANDA-SAVDO” MChJga asos solgan.

“SCHETCHIK.UZ” brendi ostida gaz, elektr energiyasi va suv hisoblagichlarini sotish bilan shug‘ullanuvchi kompaniya asoschisi.

«Olqishlarga sabab bo‘ladigan sarmoyalardan ehtiyot bo‘ling. Eng yaxshi sarmoyalar esnashni keltirib chiqaradi», — degan edi mashhur investor Uorren Baffet. Hisoblagichlar — kamdan-kam talab qilinadigan, oddiy, zerikarli biznes. «Schetchik.uz»ning asosiy g‘oyasi — daromad nazoratga teng. Xarajatlarni nazorat qilish orqali siz daromad olasiz. Biz odamlarga pul sanashda yordam beramiz, yana bir muhim muammoni hal qilamiz — mijozdan nosozlikka aloqador emasligini isbotlashni talab qilmasdan, hisoblagichni almashtiramiz yoki ta’mirlaymiz. Tez orada biz elektron hisoblagichlarning yuqori texnologiyali modellarini mustaqil ishlab chiqarishga o‘tamiz. O‘zbekistonda ularni ishlab chiqarish hanuzgacha yo‘lga qo‘yilmagani noto‘g‘ri. Kommunal xizmatlar — yuqori raqobatli va muammoli soha; bu yerda jiddiy o‘yinchilar ko‘p va hal etilmagan vazifalar ham bisyor. Bu qiyin. Lekin qiziq! Har qanday muammo — noma’lum yechimlarga olib boruvchi so‘qmoqdir.

UY-JOY KOMMUNAL XIZMATLARINING BIR QISMINI yerto‘la darajasidan zamonaviy darajaga ko‘tarish zarur. Bunda elektr energiyasi, gaz, suv hisoblagichlari ma’lumotlarini avtomatlashtirilgan tarzda hisobga oladigan va hamma uchun ochiq bo‘lgan tizimni joriy etish lozim. Hisoblagich ko‘rsatkichlarini o‘qish muammosi dolzarbligicha qolmoqda: raqamlarni ko‘rish qiyin, ular xira ko‘rinadi, ularni aniqlash uchun turli hiylalarga borishga to‘g‘ri keladi. Vaholanki, ideal holatda ma’lumotlar mobil telefonga USSD-so‘rov orqali kelishi, mijozlar esa hisoblagich ko‘rsatkichlarini xuddi telefondagi hisob qoldig‘ini tekshirgandek oson tekshirishi kerak. Biz gadjetlar va hisoblagichlarni integratsiya qilish hamda texnologiyani odamlar uchun qulay qilish haqida jiddiy o‘ylayapmiz.

BIZ MIJOZLAR BILAN AN’ANAVIY USULDA — yuzma-yuz muloqot qilamiz, elektron ommaviy axborot vositalari orqali muloqot qilish tizimi yo‘lga qo‘yilmagan. Uy-joy kommunal xo‘jaligi sohasini onlayn formatga o‘tkazish, so‘rov va shikoyatlarni qabul qilib, ularni qayta ishlash, abonentlarning murojaatlariga malakali javob berish, kommunal sohadagi minglab muammolarni internet orqali hal etish zarur. Biz aqliy xarita asosida abonentlarning ehtimoliy savollariga javoblar andozalarini shakllantirdik va bu tizimni koll-markazda joriy qildik. Bunday onlayn xizmatni yo‘lga qo‘yish — birinchi raqamli vazifadir.

XALQARO JURNALISTIKADEK MUTAXASSISLIKKA ALOQADOR BO‘LMAGAN TA’LIM biznes yuritishga xalaqit bermaydi. Aksincha, inson faqat «o‘z qozonida qaynasa», yuksak cho‘qqilarni zabt eta olmaydi! Tarixda qiziqarli misollar ko‘p: Chexov shifokor, Viktor Soy — yog‘och o‘ymakori, Merkyuri esa grafik-dizayner bo‘lgan. Turdosh yoki butunlay boshqa sohalarda kutilmagan imkoniyatlar ochiladi. Ta’limning yo‘qligini yengib bo‘lmas to‘siq deb bilish — bu o‘zini oqlash uchun zaif bahona. Toshkentda Rossiya va dunyoning boshqa mamlakatlaridan kelgan tor doiradagi mutaxassislar tomonidan trening va mahorat darslari o‘tkazilmoqda. Ular yuqori darajadagi bilim va vositalar to‘plamini taqdim etib, iqtisodiyotda sezilarli o‘sishni va’da qiladi. Bu aql uchun ozuqa bo‘lgan Pantagryuel ziyofatiga o‘xshaydi: uni uzoq vaqt hazm qilib, o‘zingiz uchun yangi qirralarni kashf etasiz. Bu siz to‘plagan va g‘oyalaringizni dadil hayotga tatbiq etishga yordam beradigan qimmatli boylikdir.

MEN KATTA BO‘LISHNI ISTAMAYMAN. Men uchun bolalarga xos bo‘lgan samimiyat va soddalikni saqlab qolish muhim. Eynshteyn ham umrining oxirigacha qalban bola bo‘lib qolgan. Inson tug‘ilganda u nozik va zaif, o‘lganda esa qattiq va mustahkam bo‘ladi. Men esa iloji boricha uzoqroq vaqt yumshoq va egiluvchan bo‘lib qolishni xohlayman. Toshdan yasalgan avtomobil shinasini tasavvur qila olasizmi? Rezina esa o‘ziga zarar yetkazmasdan minglab kilometr aylanadi. Inson ham shunday: qanchalik muloyim bo‘lsa, umri shuncha uzoq bo‘ladi, qanchalik qaysar va qattiq bo‘lsa, shunchalik tez «uvlanib ketadi». Bryus Li aytib bergan bir xitoycha rivoyat bor: «Bir qassob bo‘lgan ekan, uning pichog‘i yillar davomida o‘z o‘tkirligini yo‘qotmabdi. Undan tig‘ni qanday qilib bunchalik yaxshi saqlashini so‘rashganda, u shunday javob bergan: «Men suyakning chiziqlari bo‘ylab yuraman. Uni kesishga, sindirishga yoki umuman qarshilik ko‘rsatishga urinmayman. Bu faqat pichoqqa ziyon yetkazadi». Hayotda ham to‘siqlarni chetlab o‘tish kerak. Agar ularni yengishga urinsangiz, bu faqat zarar keltiradi».

MEN ERTAKLAR QO‘YNIDA ULARAYIB, SEHRLI TAYOQCHANI ORZU QILARDIM. Va uni topdim — bu biznes! U nafaqat g‘oya va rejalarni amalga oshirish uchun imkoniyat, balki kuch va qudrat ham beradi. Orzularim vazifalarga aylandi — endi ular yetib bo‘lmas narsa emas, balki osongina haqiqatga aylanadigan maqsadlardir. Aslida yechib bo‘lmaydigan vazifaning o‘zi yo‘q; agar biror muhim ishni amalga oshirish istagi bo‘lsa, uni bajarish uchun kuch ham, vosita ham topiladi.

MUSIQA MENGA OLIY LAZZAT BAG‘ISHLAYDI. Yakunlanishi kerak bo‘lgan ko‘plab ajoyib materiallar yaratilgan. Men ularni ko‘nglimda pishitib yuribman, lekin hozircha bu xomakilarni hayotga tatbiq etmayapman. Va bu chala ishlarim uchun o‘zimni kechirmayman. Ammo musiqa — Maslou piramidasining cho‘qqisi, biznes esa — poydevori. Poydevorsiz cho‘qqining o‘zi bo‘lmaydi. Daho Uoltning tadbirkor ukasi Roy Disney kompaniyani barqaror moliyaviy izga solib, ijod bilan sig‘ishmaydigan muammolarni hal qilgan. Usiz Uolt shunchaki yaxshi rassom bo‘lib qolardi. Mening bir qismim biznesda bo‘lishi, ikkinchisi esa musiqa yozishi kerak. Lekin ichimdagi nimadir hali bunga tayyor emas. Men to‘laqonli yashash va ijod qilishga xalaqit beradigan yagona dushmanlarim — tarqoqlik va intizomsizlikka qarshi kurashaman. Axir hayotning o‘zi zaifliklarni yengishdan iborat-ku.