Pavlov Yuriy

1965-yilda tug‘ilgan.

Sankt-Peterburg davlat texnologiya institutini tamomlagan.

2009-yilda “Aqua Style Group” MChJ kompaniyasiga asos solgan.

SUVDAGI BIZNES — jozibador va istiqbolli, biroq ayni paytda o‘ta murakkab, mashaqqatli mehnat hamda chuqur bilim talab etadigan soha. Loyiha ilk bor ishga tushirilganida ko‘pchilik hayratda edi: axir suvimizning sifati a’lo bo‘lsa, filtrlar nega kerak? Ammo suv — cheksiz manba emas, uning sifati tobora yomonlashmoqda. Insonning antropogen ta’siri ham o‘z izini qoldirmay qolmayapti, u atrof-muhitga salbiy ta’sir ko‘rsatmoqda. Dunyoda toza ichimlik suvi zaxiralari kamayib boryapti, ko‘plab mamlakatlarda suv neftdan ham qimmat turadi va bu — jahon miqyosidagi birinchi raqamli muammo. Bizning mintaqamiz bu borada nisbatan barqaror: tog‘lar, suv omborlari bizni suvbilan ta’minlab turibdi, lekin tabiatda hech narsa abadiy emas. Faoliyatimiz kuchli ekologik ahamiyatga ega, negaki inson, millat va atrof-muhit salomatligi ichimlik suvi sifatiga bog‘liq. Eng so‘nggi ishlanmalar har qanday sifatdagi suvdan sof H2O molekulasini ajratib olish imkonini beradi. Bugungi kunda bunday ilg‘or texnologiyalar nafaqat koinotda, balki O‘zbekistonning ko‘plab sanoat korxonalarida ham qo‘llanilmoqda.

ASRLAR TUTASHGAN PALLADA biz ommaviy “menejerlik”ka duch keldik — hamma ishchi kasblarni mensimay, “oq yoqalilar”ga aylandi-qoldi. Vaholanki, mamlakat yalpi ichki mahsulotining asosiy ulushini aynan ishlab chiqarish ta’minlaydi. Bugungi kunga kelib ishchi kadrlar tanqisligi keskin sezilmoqda. Ishchilar sinfini qayta tiklash, ishlab chiqarish yo‘nalishlarini rivojlantirish, malakali texnik mutaxassislar tayyorlaydigan maxsus kollejlarni tashkil etish zarur. Mamlakatimiz ishlab chiqaruvchilari yangi ish o‘rinlari yaratishga va ishchilar sinfini qaytadan shakllantirishga tayyor.

“AQUA STYLE GROUP” AKTIVLARI — o‘z ishlab chiqarish bazasi, dastgohlar parki, shuningdek, kichik, ammo malakali mutaxassislardan iborat shtatni o‘z ichiga oladi. Ular orasida uskunalar montajchilari, chilangar-yig‘uvchilar, muhandis-texnologlar, payvandchilar, tokarlar bor — bularning barchasi “TAPOiCh”, “Foton”, “Texnolog” kabi zavodlardan chiqqan kadrlardir. Biz uskunalar ishlab chiqaramiz va servis markazining barcha xizmatlarini ko‘rsatamiz: montaj, ta’mirlash, kafolatli va kafolatdan keyingi xizmat ko‘rsatish, quvvatni oshirish talab qilinganda esa mavjud suv tozalash tizimlarini modernizatsiya qilish shular jumlasidandir. Doimiy mijozlarimiz ayni shunday mahalliy mahsulotni olish evaziga valyuta mablag‘larini sarflashdan ozod bo‘lishgan.

HAR QANDAY ISHDA pirovard natijani ko‘ra bilish va u bilan — bajarilgan ish sifati, bejirim tashqi ko‘rinishi, odamlarga keltirayotgan foydasi bilan faxrlanish muhim. Yangi mijozlarimiz “Filtrlaringiz qayerdan olib kelinadi?” degan savolga “O‘zbekistonda ishlab chiqarilgan” degan javobni eshitib, hayron qolishadi. Biz oldinga intilmoqdamiz: ishlab chiqarishni kengaytirish, marketingni joriy etish va asosiy e’tiborni mahsulotni xorijga sotishni rivojlantirishga qaratishni rejalashtiryapmiz. Bugungi kunda mahsulotlarimizni MDH mamlakatlarida sotish uchun ulgurji kompaniyalar xarid qilmoqda, biz esa bu jarayonni yanada madaniylashtirmoqchimiz.

BIROVGA YOLLANIB ISHLASANGIZ, kuniga 8 soat mehnat qilasiz, o‘zingiz uchun ishlasangiz — sutkasiga 24 soat. Birinchi holda, ishingizdan boshlig‘ingiz rohatlanadi, ikkinchisida esa — o‘zingiz. Farqi ham aynan shunda.