Sultonova Dilnoza Ayrulmasovna

Sultanova Dilnoza Ayrulmasovna, 1-fevral kuni Toshkent shahrida tug‘ilgan.

1991-yilda Toshkent Xalq xo‘jaligi institutining iqtisodiyot fakultetini “Moliya va kredit” mutaxassisligi bo‘yicha tamomlagan.

2005-yilda sertifikatlangan amaliyotchi buxgalter (SAR) malakasini olgan.

Jahon bankining Iqtisodiy rivojlanish instituti, Jahon banki Xalqaro moliya korporatsiyasi, TACIS, USAID xalqaro loyihalarida tahlilchilikdan loyiha rahbarligigacha bo‘lgan vazifalarda faoliyat yuritgan. CIPAEN mustaqil imtihonlar tarmog‘ining shakllanishi va rivojlanishiga faol hissa qo‘shgan.

BARQARORLIK va farovonlikni har qanday kompaniyada kadrlar belgilab beradi. Bu – o‘zgarmas haqiqat. Shtatda yuqori malakali mutaxassislarning bo‘lishi juda muhim, moliya va buxgalteriya kabi sohalarda esa bu shunchaki zaruratdir. Bizning korporativ treninglarimiz bu masalani muvaffaqiyatli hal qiladi. CIPA sertifikatlash dasturining maqsadi – buxgalter va auditor kasbining nufuzini oshirish, moliyaviy hisobot, audit hamda Kasbiy odob-axloq kodeksining xalqaro standartlarini ilgari surishdan iborat. Ushbu dastur MDHning aksariyat mamlakatlarida e’tirof etilgan bo‘lib, ko‘plab xorijiy va mahalliy hamkorlar bizning Trening-konsalting kompaniyamiz hamda Assotsiatsiyamizni sifat va barqarorlik timsoli deb biladi.

Kompaniyaning MUVAFFAQIYATI hech qachon tasodif bo‘lmaydi. Uning ortida doim jiddiy mehnat yotadi. Va, albatta, bir chimdim omad ham kerak – asosiysi, imkoniyatdan foydalana bilish. Xalq xo‘jaligi institutini tugatganimdan so‘ng, meni o‘sha yerga o‘qituvchi bo‘lib ishlashga taklif qilishdi. Oradan bir yil o‘tgach, guruh tarkibida Jahon banki seminariga yuborishdi. 1992-yilda esa ko‘plab nomzodlar orasidan aynan meni AQSHda stajirovka o‘tash uchun tanlab olishdi. Ko‘pchilikning aytishicha, mening fe’l-atvorim o‘z mavqei uchun emas, balki o‘zi xizmat qilayotgan ishning muvaffaqiyati yo‘lida mansab pillapoyalaridan ko‘tariladigan klassik karyerachi timsolidir. Aniq ijobiy natija beradigan ish men uchun doim eng muhimi bo‘lgan, barcha g‘oyalarim hayotga tatbiq etilishi shart. O‘z kompaniyamda ham xodimlardan samarali ishlashni talab qilaman. Har ish kuni ertalab hammani aylanib chiqaman, ularni tinglayman, savollar beraman, mohiyatiga yetishga harakat qilaman, maslahatlarim bilan yordamlashaman. Shunda kim ishlagan-u, kim ishlayotgandek ko‘ringanini darrov bilib olsa bo‘ladi.

Ishlayotgandek KO‘RINISH – bu meni hech qachon qoniqtirmagan holat. O‘zim ham “kun o‘tdi – Xudoga shukr” qabilida yashamayman va hamkasblarimni ham shunga o‘rgatishga harakat qilaman. G‘ayratli insonning nomi doim o‘zi uchun so‘zlaydi, bunday odamga ishonch bildirishadi va u bilan uzoq muddatli hamkorlikka intilishadi. Har bir ishni oxiriga yetkazish, puxta va bor kuchni bag‘ishlab bajarish – bu mening qoidam. Albatta, pragmatizm, maksimalizm va perfeksionizm vaqt o‘tishi bilan yumshab, yanada sifatliroq darajaga ko‘tariladi, biroq mas’uliyat hissi o‘zgarishsiz qoladi.

TONG – bu mening vaqtim. Bir finjon qahva, sukunat, yangi kunga fikrni jamlab, tayyorgarlik ko‘rish imkoniyati. Qizalog‘im Kamilla ham do‘stim, ham yordamchim. U bilan ikkimiz hech qachon zerikmaymiz. Oldinda rejalar ko‘p: CIPA dasturi bo‘yicha so‘nggi, yettinchi imtihonni topshirish, o‘z vaqtida qoldirilgan nomzodlik dissertatsiyasini himoya qilish, mahsulotlarimizni yangi zamon talablariga mos ravishda tubdan qayta ishlab chiqish… Va, albatta, Kamilla bilan biror ajoyib, ertakmonand joyga, dengiz bo‘yiga yoki o‘rta asr qal’alariga sayohat qilish kerak – biz bunga munosibmiz.