Ryabov Oleg Vladimirovich

Oleg Vladimirovich Ryabov 1985-yil 13-fevralda Toshkent shahrida tug‘ilgan.

2006-yilda Jahon iqtisodiyoti va diplomatiya universitetining "Xalqaro iqtisodiy munosabatlar" fakultetini tamomlagan.

O‘sha yili, diplomimni himoya qilganimdan so‘ng, darhol Germaniyaga, RRL Rail & Road Logistics Mukran GmbH, yarim yil amaliyot o‘tagan.

Toshkentga qaytib, 2006-yilning kuzida RRL kompaniyasining vakolatxonasini ochdi.

BIR YIL AVVAL «RRL Tashkent» kompaniyasi nemis kompaniyasining vakolatxonasidan MCHJga aylantirildi. Bunga mahalliy buyurtmachilardan nafaqat Yevropadan, balki Markaziy Osiyo mintaqasi mamlakatlaridan ham ichki yuk tashish bo‘yicha so‘rovlar tusha boshlagani sabab bo‘ldi. Bir yil ichida Osiyo va MDH mamlakatlaridagi yirik transport tugunlarida logist-mutaxassislarning zich tarmog‘i yaratildi. Olmaotada filialimiz, Gonkong, Shanxay, Bandar-Abbosda agentlarimiz bor — ular orqali Hindiston, Malayziya va Xitoydan, shuningdek, boshqa ko‘plab shaharlardan yuklar oqimi o‘tadi. Toshkent juda qulay geografik hududda joylashgan, shu bois bizda nafaqat O‘zbekiston, balki butun Markaziy Osiyo mintaqasi bo‘ylab ishlash imkoniyati mavjud.

IMKONIYAT… O‘ylaymanki, biznesda eng asosiysi — imkoniyatlardan foydalana bilish. Diplom himoyasidan so‘ng, o‘sha kechasiyoq Germaniyaga stajirovkaga uchib ketdim. Imkoniyat paydo bo‘ldi-yu, men uni qo‘ldan chiqarish niyatida emasdim. Oldingga katta maqsadlar qo‘yish mantiqan to‘g‘ri, negaki ularga yetishish osonroq. Agar jiddiy aytadigan bo‘lsak, har qanday osmono‘par va yetib bo‘lmasdek tuyulgan maqsad ham kichik, uddalasa bo‘ladigan qismlarga oson bo‘linadi — shularga birma-bir erishib, oldinga yurish kerak. O‘z ishingni savodli boshlash va yuritish uchun olgan bilimlarim yetarli edi — universitetda talabalardan bor kuchini ishga solishni talab qiladigan ajoyib pedagoglar dars bergan. Va, albatta, o‘z imkoniyatlarimni maksimal ro‘yobga chiqarishga intilishim yordam berdi. Men o‘z-o‘zini ro‘yobga chiqarish vazifamni tashkilotchilik qobiliyatlarimni namoyon etishda hamda kompaniyani boshqarishda strategik fikrlashni qo‘llashda ko‘raman. Men uchun eng muhimi shunchaki shaxsiy boyish emas, balki faoliyatni kengaytirish, moliyaviy mustaqillik va kompaniya barqarorligidir.

MUSTAQILLIK va BARQARORLIK — kompaniyaning mustaqilligi va barqarorligi unda ishlaydigan odamlardir. Bizda o‘zimiz ishtirok etishimiz mumkin bo‘lgan yirik loyihalardan doimo xabardor bo‘lib turadigan kuchli tahliliy bo‘lim mavjud. Biz hech qachon kutib o‘tirmaymiz, doimo izlanishdamiz va potensial buyurtmachilar bilan ishlashga tayyormiz. Mobillik va kompetentlik — asosiy tamoyilimiz. «RRL» erishgan yutuqlarning sakson foizi jamoaning xizmatidir. Mening xizmatim esa, avvalo, mutaxassislarni to‘g‘ri tanlay bilish va muvaffaqiyatli hamkorlik uchun sharoit yaratishdan iborat. Kompaniya xodimlari mening biznesda “sen yetti o‘lchab bir kesguningcha, boshqa birov kesib ketadi” degan va doim birinchi bo‘lish kerakligi haqidagi qarashlarimga to‘la qo‘shiladilar. Strategik rejalashtirish va tezkorlik — kompaniya muvaffaqiyatining formulasi. Biz birgalikda umumiy maqsadlarga erishamiz, ular esa, pirovardida, har bir xodim uchun shaxsiy maqsadga aylanadi.

BIR DAQIQA QOIDASI BOR — agar qaror “ha” yoki “yo‘q” degan javobni talab qilsa, uni o‘sha zahoti, hech qanday paysalga solmasdan qabul qilish mumkin. Bu qobiliyat biznes uchun juda muhim. Yana biri — o‘z ustida ishlash. O‘z bilimingga kiritilgan sarmoya doim foyda keltiradi.

DAM OLISHMI? Sport zal — qo‘l jangi. Bu ham o‘ziga xos tarzda o‘z ustida ishlash va o‘z-o‘zini takomillashtirishdir. Yakkakurash tamoyillari ham ko‘cha, ham biznes yuritish uchun birdek to‘g‘ri keladi. Bu agressiya emas, bu — ishlarni aniq yuritish va o‘z xulq-atvor yo‘nalishingga sodiq qolish imkonini beradigan sovuqqon xotirjamlik. Chet fikrlarni inkor etib bo‘lmaydi, biroq ularni so‘nggi haqiqat deb qabul qilish ham mening qoidamga zid. Men uchun, umum qabul qilingan ma’noda, obro‘li shaxslarning o‘zi yo‘q. Faqat sevimli kitoblarimning mualliflarigina men uchun obro‘li bo‘lishi mumkin.

KITOBLAR… Lev Gumilyovning “Passionarlik nazariyasi”. Garmonik insonda passionarlik va biologik instinkt bir-birini muvozanatda ushlab turadi va u yaxshi moddiy sharoitlarda ijodda ham, biznesda ham ajoyib natijalarga erisha oladi, degan fikrga to‘la qo‘shilaman. Asosiysi — garmoniyani buzmaslik. Yaxshi moddiy sharoit yaratishni esa o‘z zimmangga olsang ham bo‘ladi… Inson zoti go‘zal ekaniga chin dildan ishongan ingliz diplomati Filip Stenhop Chesterfildning “O‘g‘liga maktublari”… Agar farzandlaringizni uning maktublari asosida tarbiyalasangiz, ular, shubhasiz, ajoyib insonlar bo‘lib ulg‘ayadi…