Karimov Ne’matulla Fatxullayevich

1971-yil 2-dekabrda tug‘ilgan.

1993-yilda Toshkent davlat iqtisodiyot universitetini tamomlagan.

1997-yilda O‘zbekiston Respublikasi Prezidenti huzuridagi Davlat va jamiyat qurilishi akademiyasini tugatgan. Iqtisodiyot fanlari nomzodi.

2005-yilda Bolgariyada Sharqiy Yevropa va MDH mamlakatlari uchun “Xalqaro audit standartlari” hamda “Samaradorlik auditi” kurslari bo‘yicha “INTOSAI”ning sertifikatlangan treneri bo‘lgan. Litvada “INTOSAI”ning “Xalqaro audit standartlari” va “Davlat mablag‘lari samaradorligi auditi” mavzularidagi maxsus kurslarida tahsil olgan.

2008-yilda O‘zbekiston Respublikasi Bank-moliya akademiyasini tamomlagan. Iqtisodiyot fanlari doktori, dotsent.

O‘zbekistonning xususiy va davlat sektorlarida hamda “Deloitte” xalqaro kompaniyasida auditorlik faoliyatini yuritgan. MDH va Sharqiy Yevropa mamlakatlarining bank hamda oliy moliya nazorati organlari xodimlari uchun audit va buxgalteriya hisobining xalqaro standartlari, shuningdek, “INTOSAI” standartlari mavzularida dars bergan. O‘zbekiston Auditorlar palatasi Kengashining raisi.

2009-yildan “GRANT THORNTON” auditorlik tashkilotining boshqaruvchi hamkori.

O‘zbekiston bozorida 25 yildan ortiq vaqt mobaynida, jumladan, «PricewaterhouseCoopers», «Ernst and Young», «Deloitte», «KPMG» kabi “katta to‘rtlik”ning xalqaro kompaniyalari bilan to‘laqonli raqobatlashib, xalqaro kompaniya maqomida faoliyat yuritayotganimizdan faxrlanamiz. Maqsadimiz — O‘zbekiston fuqarolari ham xorijiy mutaxassislar darajasida ishlay olishini isbotlash. 2000-yilda Jahon banki «GRANT THORNTON» kompaniyasini ishonchga loyiq deb tan oldi, shundan so‘ng biz xalqaro darajaga chiqdik hamda Jahon banki va boshqa Xalqaro moliya institutlari tomonidan moliyalashtiriladigan loyihalar auditini o‘tkazish imkoniyatiga ega bo‘ldik.

«GRANT THORNTON INTERNATIONAL» kompaniyasi a’zosi sifatida biz xalqaro standartlar darajasidagi audit va buxgalteriya hisobining metodologik hamda resurs bazasidan foydalana olamiz, tajriba almashish uchun xorijiy mutaxassislarni jalb qilamiz, shuningdek, hamkor kompaniyalarimiz joylashgan 138 mamlakatda o‘z xodimlarimizni o‘qitamiz. Moliyaviy-xo‘jalik faoliyati auditi moliyaviy hisobotning shaffofligini ta’minlaydi. Bu esa potensial xorijiy investorlar yoki mavjud ta’sischilarga bizning xulosamiz asosida kompaniya holatini yaqqol ko‘rish imkonini beradi.

AUDIT SOHASIDA BIZ O‘Z O‘RNIMIZNI TOPDIK, KONSALTING ESA — O‘zbekistonda biz rivojlantirishni maqsad qilgan istiqbolli yo‘nalishdir. O‘zbekiston bozorining o‘ziga xos jihatlari va mamlakat qonunchiligining aniq maqsadga yo‘naltirilgani xorijiy ekspertlar uchun murakkablik tug‘dirishi mumkin. Biz esa O‘zbekistonda ishlab, me’yoriy bazani, turli sohalarning o‘ziga xosliklarini bilganimiz va kerakli resurslarga ega bo‘lganimiz holda, muammoni ichkaridan o‘rganamiz. Shu jarayonda ishlab chiqarishdagi, kadrlar boshqaruvidagi zaif tomonlarni aniqlab, natijada ishlab chiqarish siklini ham, boshqaruv mexanizmini ham takomillashtirish bo‘yicha amaliy tavsiyalar va dolzarb yo‘nalishlarni taqdim eta olamiz.

Muvaffaqiyatli misollardan andaza olmay, YANGI ISH BOSHLASH doim tavakkalchilikdir, biroq muvaffaqiyatga erishilsa, sizni g‘alaba kutadi. Bozor cheklangan: o‘z o‘rnini topgan bir ishtirokchi uchun hammasi yaxshi, ammo raqobatchilar paydo bo‘lishi bilan daromad qayta taqsimlanadi va bu hafsalasizlikka olib keladi. Yengil emas, samarali yo‘llarni izlash lozim. Aksariyat odamlar eng tez va eng oson yo‘llarni tanlayotgan bir paytda, uzoq muddatli istiqbolda eng yaxshi natija beradigan harakatlar ketma-ketligini tanlash kerak. O‘zbekistonda ishlab chiqarishni rivojlantirish uchun ulkan salohiyat bor, bozorda esa respublikaning o‘zida ishlab chiqarish mumkin bo‘lgan import mahsulotlari juda ko‘p. Moliyaviy xarajatlardan qo‘rqish, xodimlarni o‘qitish, uskunalar xarid qilish va sotuv bozorini topish bilan bog‘liq muammolar bunga to‘sqinlik qiladi. Ishni kichikdan boshlash, har bir tafsilotni chuqur o‘rganish, amalda bo‘lmasa-da, nazariy jihatdan ishlab chiqarish jarayonining har bir bo‘g‘inini bilish, ya’ni biznesni rejalashtirayotgan sohani avval batafsil o‘rganib chiqish kerak. Muvaffaqiyat garovi — qo‘yilgan vazifani to‘g‘ri tushunishda. Agar u noto‘g‘ri talqin qilinsa, eng boshidanoq to‘g‘ri yo‘lni tanlab, barcha nuqtalarni qo‘yib olgan ma’qul.

KUTILMALAR. Bizning kutilmalarimiz – bizning kelajagimizdir. Nimani kutsak, nima haqida o‘ylasak, o‘sha narsa hayotimizga kirib keladi. Yaxshilikni ishonch bilan kutsak, biz bilan odatda yaxshi voqealar sodir bo‘ladi. Shaxsiy hayotimda ham sheriklarim, xodimlarim, mijozlarim va hatto o‘z kelajagimdan kutayotgan narsalarim ro‘yobga chiqishga moyil bo‘ladi. Yaxshilikka bo‘lgan umidlarimiz odamlar va voqealarga kuchli ta’sir ko‘rsatib, aynan biz istagan narsalarni o‘ziga tortadi.

MEN O‘Z OLDIMGA juda yuqori marra qo‘yaman. Bu esa, o‘z navbatida, ko‘proq fidoiylik, katta g‘ayrat, ishga yanada yaxshiroq yondashuvni talab etadi va pirovardida yuksak natijalarga olib keladi.