Gʻulomov Nodir

Nodir Gʻulomov — texnologiyalar, ishlab chiqarish va xalqaro savdo chorrahasida faoliyat yurituvchi tadbirkor. UMED va Vanderbilt universiteti bitiruvchisi (xalqaro iqtisodiyot magistri). 2008 yildan buyon Los-Anjeles, Guanchjou va Toshkent shaharlarida savdo kompaniyalariga rahbarlik qilib kelmoqda, AQSH va Yevropa bozorlarida koʻp yoʻnalishli onlayn-savdoni rivojlantirmoqda. myBazar.uz kiyim-kechak marketpleysining hammuassisi. Toshkentdagi Vestminster universitetida raqamli marketing fanidan dars bergan.

Mendan nima bilan shugʻullanishimni soʻrashganda, koʻpincha biznesning raqamli transformatsiyasi bilan javob beraman. Ammo aslida mening ishim — texnologiyalar haqida emas. U murakkab jarayonlarni soddalashtiradigan, biznesni samarali va bashoratli qiladigan yechimlarni topish haqida.

Bu tushunchaga men darhol kelmadim. Xalqaro savdo maydonchalari bilan ishlab turgan vaqtimda, turli tizimlar oʻrtasida oʻn minglab tovar birliklarini qoʻlda muvofiqlashtirganman. Oʻshanda muammo ish hajmida emas, balki yagona tizimning yoʻqligida ekanligi aniq boʻldi. Har bir jarayon oʻz qoidalari asosida yashasa, sarflanadigan mehnat natijadan tezroq oʻsadi.

Aynan oʻsha vaqtda meni alohida loyihalar qiziqtirmay qoʻydi. Inson omilidan xoli ravishda ishni davom ettiradigan tizimlarni yaratish anchagina qiziqarli boʻldi. Hozirda raqamli transformatsiya haqida deyarli hamma gapirmoqda. Ammo texnologiyalar oʻz holicha hech narsani oʻzgartirmaydi. Ular faqatgina mavjud jarayonlarni tezlashtiradi xolos. Agar jarayon notoʻgʻri tashkil etilgan boʻlsa, avtomatlashtirish tartibsizlikni yanada tezlashtiradi va koʻlamini kengaytiradi. Shuning uchun haqiqiy transformatsiya doimo tafakkurni oʻzgartirishdan boshlanadi, keyin esa yangi vositalar joriy etiladi.

Yillar davomida faoliyatimda, shunga ishonch hosil qildimki, eng murakkab loyihalar — ularda zamonaviy texnologiyalar qoʻllanishida emas. Eng qiyini — odamlarni yagona qoidalar va yagona axborot atrofida birlashtirishdir. Har bir kichik istisno zararsizdek koʻrinadi, ammo aynan shunday istisnolardan tartibsizlik paydo boʻladi. Kuchli tizim qarorlar bir xil maʼlumotlar asosida qabul qilinadigan joyda boshlanadi.

Ish faoliyatimda men doimo haqiqiy raqamlashtirishni chiroyli texnologik namoyishdan farqlashga harakat qilaman. Men uchun oddiy mezon bor: agar yechim joriy etilgandan keyin ham odamlar eskicha ishlashda davom etsa, demak, biznesning oʻzi emas, balki faqat dasturiy taʼminot oʻzgargan. Haqiqiy oʻzgarishlar boshqacha namoyon boʻladi — muddatlar qisqaradi, xatolar yoʻqoladi, rahbarlar qarorlarni intuitsiyaga emas, maʼlumotlarga tayanib qabul qila boshlaydi.

Bugun men uchun ayniqsa oʻzbek ishlab chiqaruvchilarini xalqaro bozorlarga chiqishlarida yordam berish qiziq. Mamlakatimizda kuchli ishlab chiqarish bazasi, yangi texnologiyalarni tez oʻzlashtira oladigan yosh mutaxassislar va koʻplab davlatlarga nisbatan tezroq va arzonroq tajriba qilish imkoniyati kabi jiddiy raqobatbardosh ustunliklar bor. Ammo faqat sifatli mahsulotning oʻzi yetarli emas. Jahon bozorida barqarorlik, bashoratlilik va ishonch qadrlanadi. Xaridor faqat tovarni emas — u bugun, bir oydan keyin va bir yildan keyin ham bir xil sifatni olish ishonchini tanlaydi.

Men ishonamanki, Oʻzbekiston nafaqat xorijiy texnologiyalarni isteʼmol qiluvchi, balki butun dunyoda talabga ega boʻladigan oʻz raqamli yechimlarini yarata oladigan davlatga aylanishi mumkin. Buning uchun alohida loyihalar doirasida fikrlashni toʻxtatib, biznesning real muammolarini hal qiladigan mahsulotlar yaratishni oʻrganish kerak.

Agar qanday iz qoldirmoqchi ekanimni soʻrasangiz, javob oddiy. Men uchun eng muhimi — Oʻzbekistondan turib ham jahon darajasida raqobatbardosh mahsulotlar yaratish va global bozorda muvaffaqiyatli ishlash mumkinligini shaxsiy misolimda isbotlash. Eng katta yutuq esa shu misol orqali chegarasiz fikrlaydigan va butun tarmoqlarni oʻzgartirishga qodir yechimlar yaratadigan yangi avlod tadbirkorlari paydo boʻladigan davr boʻladi.