Abduraximova Gulnara Qo‘chqorovna

Abdurahimova Gulnora Qo‘chqorovna 1951 yil 2 dekabrda tug‘ilgan. Maktabni tamomlagach, Qozog‘iston kimyo-texnologiya institutiga o‘qishga kirib, shu sohada oliy ma’lumot olgan. 1975 yildan boshlab kadrlarni tayyorlash, qayta tayyorlash va ularning malakasini oshirish bilan professional ravishda shug‘ullanib kelmoqda. Ushbu sohaga 50 yildan ortiq umrini bag‘ishlagan.

Kasbiy tayyorgarlik sohasida 50 yildan ortiq vaqtdan beri mehnat qilib kelaman. Bu davr mobaynida korxonalar, texnologiyalar, me’yoriy talablar o‘zgardi, ammo asosiy tamoyil o‘zgarishsiz qoldi: ishlab chiqarish xavfsizligi, avvalo, insonlarning kasbiy malakasi va salohiyatidan boshlanadi. Shuning uchun «PROFRESURS» MChJning vazifasi men uchun kurslar o‘tkazish va hujjatlar berishdan ancha keng tushunchadir. Biz korxonalarda xavfsizlik madaniyatini shakllantiramiz.

«PROFRESURS» MChJdan oldin «HUNAR-FABI» MChJ qoshida o‘quv markazi faoliyat yuritgan. Turli sabablar tufayli uni yopishga to‘g‘ri keldi, ammo jamlangan bilim va tajriba, eng muhimi, mijozlarning ishonchi faoliyatimni o‘z o‘quv markazimda davom ettirish imkonini berdi. O‘sha paytda hamkorlik qilgan ko‘plab tashkilotlar hozirgacha men bilan ishlab kelmoqda. Men uchun bu obro‘-e’tiborimizning eng xolis ko‘rsatkichlaridan biridir.

Bugungi kunda biznesning mehnatni muhofaza qilish va sanoat xavfsizligiga munosabati sezilarli darajada o‘zgardi. Ko‘plab korxonalar uchun bu tushunchalar allaqachon jamoaviy madaniyatning bir qismiga aylangan. Ammo muammo hanuz saqlanib qolmoqda: ba’zan aynan rahbarga murojaat qilib, xavfsizlik rasmiyatchilik yoki ortiqcha xarajatlar moddasi emasligini tushuntirish eng qiyin bo‘ladi.

Bunda iqtisodiy jihat juda tushunarli. Xodimning malakasi ishning sifati va tezligiga bevosita ta’sir qiladi. Tayyorgarlikdan o‘tgan mutaxassis xatolarni kamroq sodir etadi, ishlab chiqarishda jarohatlanish, avariyalar, ishlab chiqarishning to‘xtab qolishi va keyingi tekshiruvlar ehtimoli kamayadi. Shuning uchun xodimlar bilimiga kiritilayotgan sarmoya bir vaqtning o‘zida biznes barqarorligiga kiritilayotgan investitsiya hamdir.

Biz o‘qitish natijasi faqat guvohnoma bilan cheklanib qolishini qat’iyan istamaymiz. Olingan bilimlar rahbariyatimiz va o‘qituvchilarimiz ishtirokida o‘tkaziladigan malaka imtihonlarida tekshiriladi. Biz uchun inson haqiqatan ham o‘z ishini xavfsiz bajarishga tayyor ekanini anglash muhim.

O‘zbekiston sanoati rivojlanib bormoqda va malakali kadrlarga bo‘lgan talab yanada ortib boradi. Ayniqsa, mehnatni muhofaza qilish va texnika xavfsizligi bo‘yicha bilimli, malakali muhandislarga talab yuqori bo‘ladi. Shu bilan birga, ishchi kasblarga bo‘lgan ehtiyoj ham yo‘qolmaydi — kran mashinistlari, payvandchilar va haqiqiy ishlab chiqarishni ularsiz tasavvur qilib bo‘lmaydigan boshqa mutaxassislarga hamisha talab bo‘ladi.

Raqamli texnologiyalar yangi imkoniyatlarni yaratmoqda. Biz onlayn ta’limdan foydalanamiz, tinglovchilarning markaz mutaxassislari bilan doimiy aloqada bo‘lishini ta’minlaymiz. Bu kursni tugatganidan keyin ham inson amaliy masala yuzasidan murojaat qilishi mumkinligini anglatadi. Sun’iy intellekt ko‘plab jarayonlarni soddalashtirishga qodir, ammo bizning kasbimizda men hamon insonlar o‘rtasidagi muloqotni algoritmlardan ustun qo‘yaman. Har bir korxonaning o‘z jarayonlari, xavf-xatarlari va vazifalari bor, shuning uchun individual yondashuvning o‘rnini bosish qiyin.

Men uchun «PROFRESURS» MChJ faoliyatining eng yaxshi natijasi berilgan hujjatlar soni emas, balki ko‘p yillik hamkorlikdir. Korxona har yili bizga qayta murojaat qilsa, xodimlarini malakasini oshirish va yangi ruxsatnomalar olish uchun yuborayotgan bo‘lsa, demak, u bizning ishimizga ishonadi.

50 yil davomida men birorta ham murojaatni e’tiborsiz qoldirmaslikka odatlanganman. Hamkasblarim, agar vaziyatdan chiqish yo‘li yo‘qdek tuyulsa, men uni topishga harakat qilishimni biladi. Tajriba menga bir vaqtlar murakkab bo‘lib ko‘ringan vaziyatlarni xotirjamlik bilan hal qilishni o‘rgatdi.

Doimo yonimda bo‘lgan, meni har tomonlama qo‘llab-quvvatlaydigan va umumiy ishimizni men bilan birga rivojlantirayotgan insonlarga, o‘z jamoamga alohida minnatdorlik so‘zlarini aytmoqchiman. Agar ular bo‘lmaganida, bugun menda — aniqrog‘i, bizda bor narsaning hatto yarmiga ham erisha olmagan bo‘lardim. Shuning uchun «PROFRESURS» MChJning yutuqlari, avvalo, bizning umumiy mehnatimiz natijasidir.

«PROFRESURS» MChJning keyingi maqsadi- o‘quv markazini rivojlantirishdan ham kengroq. Men biz O‘zbekistonda xavfsizlik madaniyatining yangi standartini shakllantirishda ishtirok etishimizni istayman. Chunki haqiqiy xavfsizlik hujjatdan boshlanmaydi. U insonning o‘z ishiga bo‘lgan munosabatidan boshlanadi.