Aripov Mahamadjon Shovkatovich

Aripov Mahamadjon Shovkatovich 1979-yil 27-martda Toshkent shahrida tug‘ilgan.

1997-yilda TDIU akademik litseyini tamomlagan.

2003-yilda Toshkent arxitektura-qurilish institutining muhandislik-qurilish fakultetini tamomlagan.

Institutni tugatgach, X. Asomov nomidagi O‘zLITTI loyiha institutida ishlagan.

2004-yilda Sobir Rahimov hokimligi qurilish bo‘limiga bosh mutaxassis sifatida ishga o‘tdi.

2005-yilda Binolar va inshootlardan foydalanish departamenti bo‘lim boshlig‘i etib tayinlandi.

2006-yildan buyon "BIO-SUT" qo‘shma korxonasida ijrochi direktor lavozimida ishlab kelmoqda.

Uylangan, ikki farzandi bor.

BIO FALSAFASI — bu kompaniyamiz o‘z faoliyatining ilk kunidan boshlab to hozirgacha amal qilib kelayotgan tamoyildir. Biz ko‘pincha tijoriy tavakkal bo‘lishiga qaramay, ekologik toza va tirik mahsulotlar ishlab chiqaramiz. Haqiqiy pasterizatsiya qilingan sutning saqlash muddati juda qisqa. Ko‘plab kompaniyalar mahsulotning yaroqlilik muddatini uzaytirish ustida ishlay boshladi. Bularga barqarorlashtiruvchi qo‘shimchalar, sterillash va yangi qadoqlar kiradi. Aslida bunday mahsulotning o‘zi sog‘liq uchun zararli emas. U tijoriy jihatdan o‘zini oqlaydi. Lekin bunday mahsulotlar qorinni to‘ydirishi mumkin, xolos. Sog‘liqqa esa faqat organizm uchun zarur bakteriyalar va mikroelementlarga boy tirik sutgina foyda keltiradi. Hozir Yevropadagi oddiy supermarketlarda ekologik toza mahsulotlarni topish qiyin. “Bio” qo‘shimchasi bilan maxsus do‘konlar ochilmoqda, biroq bu nomni olish juda mushkul. Buning uchun daladan tortib to sotuvgacha bo‘lgan har bir bosqich ISO 9001 bo‘yicha sertifikatlangan bo‘lishi kerak. Albatta, bu mahsulotlar juda qimmat va aholining atigi o‘ndan bir qismigina ularni xarid qila oladi.

BU BORADA O‘zbekiston hozircha ancha qulay ahvolda. Bizning barcha mahsulotlarimiz tabiiy, genetik modifikatsiya qilinmagan, Respublikamiz esa yaxshi seleksiya bazasiga ega. Hayvonlar vitaminli sanoat briketlarini emas, balki yangi o‘tni yeydi. Bu — katta ustunlik. Hukumatimiz ham go‘sht-sut sanoatini rag‘batlantirish uchun bir qator chora-tadbirlarni amalga oshirdi — uskunalar, xomashyo va ingrediyentlar uchun ayrim soliq va bojxona to‘lovlaridan ozod qildi. Bu esa biomahsulotlar ishlab chiqarishga yo‘naltirilgan texnologiyalarni iloji boricha uzoqroq saqlab qolish imkonini beradi. Sog‘lom odam, albatta, sterillangan sutni ham iste’mol qilishi mumkin, biroq aholining aksariyat qatlami uchun tirik sut afzalroqdir. Yangi tayyorlangan sut mahsulotlari salomatlikni mustahkamlashga yordam beradi va bu yo‘nalishni millat salomatligining tarkibiy qismi sifatida saqlab qolish juda muhim.

ASOSIYSI — sog‘liq, qolgani esa o‘z-o‘zidan bo‘laveradi. Shuningdek, texnologiya sofligi ham muhim. Kompaniyamizda sut Italiyada ishlab chiqarilgan zamonaviy yuqori texnologiyali filtrlar va separatorlar yordamida sinchkovlik bilan tozalanadi va pasterizatsiya qilinadi. Qadoqning ekologik tozaligi va mustahkamligiga katta e’tibor qaratamiz. Kompaniyamiz rejalarida ta’m va, ayniqsa, foydali xususiyatlari jihatidan boshqa har qanday import mahsulotlaridan qolishmaydigan sut mahsulotlari assortimentini kengaytirish bor. Ammo kompaniyamizning asosiy tamoyili — BIO falsafasi — o‘zgarishsiz qoladi: mahsulotlarimizning asosiy qismi shaharliklarga erta tongda, qisqa saqlash muddati bilan, barcha foydali mikroelementlar va bakteriyalarni saqlagan holda, ularning salomatligi uchun yetkazib beriladi...