Mirzaahmedov Diyor Akramovich

Mirzaahmedov Diyor Akramovich, 1972-yil 21-yanvarda Toshkent shahrida tug‘ilgan.

1995-yilda Toshkent arxitektura-qurilish institutini imtiyozli diplom bilan tamomlagan.

1992-1994-yillar - Istanbul texnika universiteti.

1996-1998-yillarda San’atshunoslik ilmiy-tadqiqot instituti aspiranti bo‘lgan.

1998-2005-yillarda "Tasviriy oyina" Respublika ijodiy uyushmasi Toshkent viloyati bo‘limi boshqaruvi raisi lavozimida ishlagan.

1998-yil - "Siymo" reklama agentligiga asos solgan va uning ta’sischisi hisoblanadi.

2012-yildan buyon Toshkent shahar hokimligi Obodonlashtirish bosh boshqarmasining Trenerlar va tashqi bezaklar bo‘limi boshlig‘i lavozimida ishlab kelmoqda

Hozirda O‘zbekiston Badiiy akademiyasining ijrochi direktori

HAR BIR reklama agentligining o‘ziga xos kuchli jihati bo‘lishi kerak. “Siymo” uchun bu – tashqi reklama. Faoliyatimizning qolgan barcha turlari asosiy yo‘nalishni to‘ldiradi, zero, biz buyurtmachilarga taklif etadigan to‘laqonli reklama kampaniyasi, odatda, faqat tashqi reklama bilan cheklanib qolmaydi. Bu yerda eng asosiysi – asosiy g‘oyani ishlab chiqish hamda bilbordlardagi tasvirdan tortib bukletlar dizaynigacha yagona uslubni saqlab qolishdir. Demak, bu muvaffaqiyatli va taniladigan obraz yaratish degani.

Kompaniyamiz MUVOFAQIYATIGA unda ishlaydigan insonlar hissa qo‘shadi. Ular o‘z ishiga jon-dildan berilgan ijodkor shaxslar bo‘lib, o‘zlari shug‘ullanayotgan ishdan chinakamiga zavq olishadi. Bu esa juda muhim. Ba’zan reklama agentligim menga 3D-transformatsiyani eslatadi: mijozni qanday “ilib olish” va ushlab turishni aniq biladigan yosh professional komivoyajer uning ko‘z o‘ngida reklama ishlab chiqish bo‘yicha butun bir loyiha institutiga aylanadi. Bu o‘zgarishda ma’no bor: agar agentlik “ruchka sotayotgan bola” qiyofasida qolsa, jiddiy mijoz u bilan ishlamaydi. Agar agentlik loyiha instituti obrazida qotib qolsa, unga mijozlarni tezkorlik bilan izlab topish juda qiyin bo‘ladi. Shaklni doimiy o‘zgartira olish qobiliyati – “Siymo” marketing siyosatining o‘ziga xos xususiyatidir.

INSONLAR BILAN ISHLAY OLISH QOBILIYATI VA ISTAGI – top-menejerning asosiy fazilati. Odamlarga nisbatan salbiy munosabatni hech qanday muloqot mahorati bilan niqoblab bo‘lmaydi. Men doim shunday fikrdan kelib chiqamanki, odamlar ma’lum bir muddatga – bir, ikki, uch yil yoki undan ko‘proq vaqtga o‘z taqdirlari va farovonliklarini menga ishonib topshirishgan. Men bu mas’uliyatni his qilishga harakat qilaman. Shu vaqt mobaynida ularning hayoti qanday kechishi uchun javobgarlikni o‘z zimmamga olaman. Nazarimda, boshqacha yo‘l bilan yaxshi rahbar bo‘lib bo‘lmaydi.

Odamlar bilan ishlashda, avvalo, insonning ishlash, o‘sish va o‘rganishga bo‘lgan istagiga e’tibor qarataman. Shuni aniq bilamanki, iqtidori kamroq, lekin o‘z ustida tinimsiz ishlaydigan inson iqtidorliroq kishidan doim o‘zib ketadi. Bunday insonlar mening qo‘llab-quvvatlovimga doim tayanishi mumkin.

BIZNING AVLODGA, mening tengdoshlarimga juda qiziqarli davrda yashash nasib etdi. Atrofimizdagi hamma narsa – dunyoqarashdan tortib davlatlarning siyosiy tuzumigacha – shiddat bilan o‘zgardi. Ba’zan biz yo‘nalishni anglab olishga ham ulgurmay qolardik. Ammo bu dinamika bizni kuchliroq qildi va ko‘p narsani o‘rgatdi. O‘zgaruvchan dunyoga suyanmaslikni, tashqaridan madad izlamaslikni, o‘z ichimizdan tayanch topishni o‘rgatdi. Eng muhimi – bu ma’lum bir ruhiy holat. Agar shunday holat bo‘lsa, hamma narsa o‘z-o‘zidan keladi. Jumladan, pul ham.

PUL doim yetarli bo‘ladi. Aynan qancha kerak bo‘lsa, shuncha. Hamma pulingizni bir tiyinigacha sarflab ko‘ring-da, o‘zingizga savol bering: “Xo‘sh, endi nima?” Ko‘rasizki, och qolishga ulgurmasingizdan daromadning o‘zi sizni topadi. Bu o‘z tajribamda sinalgan...

Har bir insonda bekorchilar toifasidan ustalarning toifasiga o‘tish imkoniyati bor. Hayotni xomaki yashab bo‘lmaydi.

TARIXDA hamma narsa oqilona nuqtayi nazardan sodir bo‘ladi, unga asosni esa siyosiy texnologlar – jamoat arboblari, diniy yetakchilar yaratadi. Mening ilmiy ishimning mavzusi juda qiziqarli davr – XI-XII asrlar, ya’ni islom va nasroniy madaniyatining yuksalish davri edi. Bu davrda me’morchilikda yangi, jiddiy, strukturaviy yechimlar – gumbazlar, ravoqlar, minoralarning bugungi kunda bizga tanish bo‘lgan shakl va qiyofalari paydo bo‘ldi. Evristika (ijodiy tafakkur haqidagi fan) nuqtayi nazaridan, bu inqilobiy davr bo‘lgan va bunga ulkan axborot almashinuvi jarayoni zamin yaratgan. Aslini olganda, bu Afrikadan, Mavritaniyadan tortib Xitoy va Hindistongacha cho‘zilgan yagona ijodiy makon edi. Turli madaniyatlar o‘zaro uyg‘unlashib, bir-birini boyitgan. Shunda asos bo‘luvchi uslub – yer shaklini takrorlaydigan, energetik oqimlar, suv ko‘tarilishi va pasayishi bilan uyg‘un, osmon gumbazini eslatuvchi tomyopmalar paydo bo‘ldi. Bu yechimlar tabiiy va muqarrar edi. O‘ylaymanki, yaqin orada milliy reklama uslubimizning paydo bo‘lishi ham xuddi shunday muqarrar haqiqatga aylanadi.

BIZNING O‘ZBEK reklama biznesi biroz alohida ajralib turadi, uning hali o‘z an’anasi, o‘tmishi yo‘q. Biz o‘zlashtirayotgan Amerika tajribasi, boshqa mamlakatlar tajribasi bor. Toshkentda o‘z g‘oyalarini yurtimiz zaminiga olib kirayotgan xorijiy reklama agentliklarining vakolatxonalari mavjud. Ammo reklama, xuddi me’morchilik, madaniyat va san’at singari, o‘z milliy qiyofasiga ega bo‘lishi kerak va biz ayni damda shu uslubni izlash arafasidamiz. Tayyor marketing yechimlari bor, tasodifan erishilgan muvaffaqiyatlar bor, lekin uslubning o‘zi yo‘q. Bunday uslubning paydo bo‘lishiga bozorda mahsuloti mamlakat tashqarisida ham xaridorgir bo‘ladigan va milliy iftixorimizga aylanadigan jiddiy mahalliy ishlab chiqaruvchining maydonga chiqishi zamin yaratadi.